JosephY

Nakabalik Na

Ang papel ay handa na
Umupo sa silya upang mag-umpisa
Hawak ang bolpen
Nag-isip ng malalim

Pagkaraan ng maraming minuto
Walang pumapasok sa ulo
Kung meron man
Malabo at magulo

Binalik ang bolpen sa mesa
Tumayo at humithit ng yosi
Sabay sabi
Diyan ka muna, balikan kita

JosephY

Oras Na

Kung hindi ngayon, kelan?
Huwag magpabaya
Kelangan mong kumilos
Ang oras daw ay ginto
Ito ay hawak mo
Huwag sayangin
Kung hindi iingatan
Gintong hawak mo
Ay baka maging bato

JosephY

Liwanag

Kapayapaan ng isip
Katahimikan ng paligid
Kaligayahan ng puso
Ito ay damhin at yakapin

Sa isang iglap
Pag pumasok ang dilim
Ang lahat ng ito'y
Maglalahong parang hangin

Dapat manalangin
Ang Diyos ay purihin
Sa pagpasok ng dilim
Liwanag ang siya pa ring kapiling.

JosephY

Maling Akala

Bilog na bola
Tumawag ng aking pansin
Dilaw ang kulay
Kaakit-akit sa paningin

Lumakas ang hangin
Ito'y tumagilid
Lumantad ang tainga
Akala ko'y bola, lobo pala

Mag-ingat sa maling akala
Akala mo'y sa kabutihan
Ngunit pag-ihip ng hangin
Ito pala'y sa kasamaan.

JosephY

Katotohanan

Masakit man ang katotohanan
Ito'y dapat tanggapin
Upang maitama ang mali
At maituwid ang baluktot

Sa paglabas nito
May nasirang pundasyon
Pero meron din itong
Naiayos na relasyon

Ano mang pagtatago nito
Lalabas at lalabas din
Kaya mas mabuti pang harapin
Upang kapayapaan ay maangkin.

JosephY

Takot

Hindi takot sa away
Pero takot naman sa dilim
Kayang pumunta sa giyera
Ayaw naman pumunta ng sementeryo

Makikipag-away sa mas malaking tao
Pero sa ipis ay tumatakbo
Kayang isapalaran ang sariling buhay
Ngunit hindi kayang mawalan ng mahal sa buhay

Ang Takot ay sadyang mahirap intindihin
Pero kailangan sugpuin
Upang kapayapaan ay maangkin
At makatulog ng mahimbing.